काठमाडौँ—रुकुम पश्चिमको चौरजहारी नगरपालिकामा भएको सामूहिक हत्या घटनाका सम्बन्धमा संसदीय छानबिन समितिको प्रतिवेदन कार्यान्वयनका लागि प्रधानमन्त्री तथा मन्त्रिपरिषद्को कार्यालय पठाइएको छ ।
सङ्घीय संसद्का महासचिव डा. भरतराज गौतमका तर्फबाट सरकारका मुख्य सचिवलाई सम्बोधन गरेर प्रतिवेदन सहितको पत्र पठाइएको हो । सिफारिस कार्यान्वयन गर्न प्रतिवेदन पठाइएको हो ।
अधिवेशन नचलेको अवस्था रहे पनि शीघ्र कार्यान्वयन आवश्यक रहेको भन्दै सभामुख अग्निप्रसाद सापकोटाको निर्देशनअनुसार प्रतिवेदन पठाइएको हो । सचिवालयले गरेको पत्राचारमा भनिएको छ,‘प्रतिनिधि सभाका सम्माननीय सभामुखज्यूसमक्ष मिति ०७७÷०३÷३० गते पेस गरेको प्रतिवेदन आवश्यक कार्यान्वयनका लागि सम्माननीय सभामुखज्यूको आदेशानुसार पठाइएको व्यहोरा अनुरोध गर्दछु । ’ असार ३० गते छानबिन समिति संयोजक देवेन्द्र पौडेलले सभामुखसमक्ष प्रतिवेदन हस्तान्तरण गरेका थिए । जेठ २६ गते बसेको प्रतिनिधिसभा बैठकले घटना अनुसन्धानका लागि पौडेलको संयोजकत्वमा नौ सदस्यीय संसदीय विशेष समिति गठन गरेको थियो ।
के छ प्रतिवेदनमा ?
समितिले घटनालाई अन्तरजातीय सम्बन्धका कारण उत्पन्न भएको निष्कर्ष निकालेको छ । यस्तै घटना दोहोरो झडप नभई एकपक्षीय रूपमा गराइएको निष्कर्ष समितिले निकालेको छ । यस्तै ठूलो समूह मिलेर नै आक्रमण गरी नवराज विकसहित छ जनाको हत्या भएको निष्कर्ष निकालेको छ । समितिले घटनामा संलग्नलाई प्रचलित कानुनबमोजिम कारबाही गर्न सुझाव दिएको छ ।
समितिले संवैधानिक र कानुनी प्रावधान कार्यान्वयन गर्न पनि सरकारको ध्यानाकर्षण गराएको छ । समानता र स्वतन्त्रताको हक कार्यान्वयन गर्न तथा संवैधानिक आयोग गठनको विषयलाई पनि यथाशीघ्र प्राथमिकतामा राख्न समितिले सरकारको ध्यानाकर्षण गराएको छ । समितिले पीडित परिवारलाई राज्यका तर्फबाट क्षतिपूर्ति उपलब्ध गराउन सुझाव दिएको छ ।
Leave a Reply