काठमाडौँ — आफूलाई अपहरण गरेको अभियोगमा आफ्नै श्रीमान्लाई जेल हालेपछि सप्तरीको अग्निसाइर कृष्णासवरन गाउँपालिका– ४ की बबिता इसर न्याय खोज्दै संघीय राजधानी काठमाडौं आइपुगेकी छिन् ।
दलित युवक मनोजकुमार रामसँग प्रेमविवाह गरेपछि उनका बुबा ललित इसरले हालेको मुद्दामा सप्तरी जिल्ला अदालतको आदेशले श्रीमान्लाई जेल हालेपछि बबिता न्यायको लडाइँमा छिन् ।
जिल्लामा प्रदर्शनदेखि विभिन्न अधिकारवादी संघसंस्थाको ध्यानाकर्षण गराएपछि आइतबार सर्वोच्च अदालतमा मुद्दाको पेसी लागि बबिता शनिबार एक्लै काठमाडौं आइपुगेकी हुन ।
अधिवक्ता शैलेन्द्रप्रसाद हरिजन अम्बेडकरले शुक्रबार दर्ता गराएको रिटको पेसी आइतबारका लागि तोकिएको छ । रिटमा जिल्ला अदालत राजविराजका साथै जिल्ला सरकारी वकिलको कार्यालय, जिल्ला कारागार कार्यालय र जिल्ला प्रहरी कार्यालयसमेतलाई विपक्षी बनाइएको छ ।
राष्ट्रिय मानव अधिकार आयोगको निगरानीमा कीर्तिपुरमा बसेको बबिता इसर रहेको बताइन् । ‘अहिले राष्ट्रिय मानव अधिकार आयोगको निगरानीमा कीर्तिपुरमा बसेको छु,’ बबिताले भनिन्, ‘आइतबार राष्ट्रिय मानव अधिकार आयोग र राष्ट्रिय महिला आयोग गएर मेरा सम्पूर्ण कुरा सुनाउँछु । आइतबार नै सर्वोच्चमा पेसी छ, त्यहाँ पनि आफूले भोगेका सबै विषय राख्छु ।’
Leave a Reply