काठमाडौँ — शनिबार भएको एक प्रमुख सैन्य कारबाहीमा इरानका सर्वोच्च नेता अयातोल्लाह अली खामेनीसहित शीर्ष अधिकारीहरू मारिएका छन्। अमेरिका-इजरायली संयुक्त हवाई आक्रमणमा उनीहरूको ज्यान गएको हो।
तेहरानस्थित खामेनीको परिसरलाई लक्षित गरी गरिएको यो आक्रमणलाई राष्ट्रपति डोनाल्ड ट्रम्पले इरानी जनताका लागि ‘आफ्नो देश फिर्ता लिन’ को लागि एउटा ‘परिभाषित क्षण’ भएको बताएका छन्।
प्रमुख नेताहरूको मृत्यु
आक्रमणमा खामेनीका अतिरिक्त अन्य उच्च अधिकारीहरूको पनि मृत्यु भएको पुष्टि भएको छ। जसमा इस्लामिक रिभोलुसनरी गार्ड कोर्प्स (आईआरजीसी) का कमान्डर-इन-चीफ मोहम्मद पाकपुर, रक्षा परिषद्का सचिव अली शामखानी र रक्षामन्त्री अजीज नासिरजादेह छन्।
त्यस्तै, गुप्तचर प्रमुख सलेह असादी, हतियार विकास प्रमुख होसेन जबल अमेलियन, आणविक कार्यक्रमसँग जोडिएका रेजा मोजाफ्फारी-निया र सैन्य ब्युरो प्रमुख मोहम्मद शिराजीले पनि ज्यान गुमाएको जनाइएको छ।
इरानी सरकारी सञ्चारमाध्यमले समेत शामखानी र पाकपुरको मृत्यु भएको पुष्टि गरेको छ। यता आईआरजीसीले बदला लिने वाचा गर्दै इजरायल र मध्यपूर्वमा रहेका २७ अमेरिकी अड्डामा आक्रमण जारी राखेको घोषणा गरेको छ। यसैबिच दुबई, दोहा र तेल अभिभमा थप विस्फोटका आवाज सुनिएका छन्।
इरानी राष्ट्रपति मसूद पेजेश्कियानले खामेनीको हत्यालाई ‘ठुलो अपराध’ भन्दै निन्दा गरेका छन्। सरकारले नेतृत्व सम्हाल्न तीन सदस्यीय अन्तरिम परिषद् गठन गरेको छ। खामेनीका समर्थकहरू शोक मनाउन सडकमा उत्रिएका छन्।
अब नयाँ सर्वोच्च नेता चयन नभएसम्म राष्ट्रपति पेजेश्कियान, न्यायपालिका प्रमुख र अभिभावक परिषद्का सदस्य सम्मिलित परिषद्ले नेतृत्व सम्हाल्नेछ। इरानले ४० दिनको शोक र सात दिनको सार्वजनिक बिदा घोषणा गरेको छ। आईआरजीसीले विनाशकारी प्रतिक्रियाको प्रतिज्ञा गर्दै मिसाइल र ड्रोन आक्रमण जारी राखेको भनेको छ। एजेन्सी
Leave a Reply