रास्वपाका नेता सन्तोष परियारले दिए राजीनामा

काठमाडौँ —  रास्वपाका नेता सन्तोष परियारले शुक्रबार पार्टीको साधारण सदस्य समेत नरहने गरी राजीनामा दिएका छन् । बदलिँदो परिस्थितिलाई आत्मसाथ गर्दै जेनजी आन्दोलनपछिको परिस्थितिलाई राष्ट्र र जनताको जीवनसँग जोड्न फरक खालको राजनीतिक अभियानमा सक्रिय हुनुपर्ने अवस्था आएकाले राजीनामा दिनुपरेको उनले पत्रमा उल्लेख गरेका छन् ।

नेपाली राजनीतिक आन्दोलनको पुनर्संरचना, अवधारणाहरूको पुनर्परिभाषा र संगठनहरुको पुनर्गठन  गर्नुपर्ने अबको ऐतिहासिक जिम्मेवारी युवा पुस्ताको काँधमा आएको समेत उनले राजीनामा पत्रमा उल्लेख गरेका छन् ।

यस्तै जेनजी आन्दोलनले नेपाली राजनीतिको परम्परागत जडतालाई खारेज गरिदिएको समेत उनको भनाइ छ । उनले रास्वपामा रहँदा नेपाली समाजको विशिष्ट बनावट र चरित्रअनुसारको पार्टीको विचार निर्माण गर्न नसकेको समेत उल्लेख गरेका छन् ।