काठमाडौं — राजनीतिकाे प्रारम्भिक नर्सरी मानिने स्वतन्त्र विद्यार्थी युनियन (स्ववियु) को निर्वाचन आज हुँदैछ। त्रिभुवन विश्वविद्यालयका आङ्गिक तथा सम्बन्धनप्राप्त क्याम्पसहरूमा आज निर्वाचनमार्फत विद्यार्थीहरूले आफ्ना नेताहरू चुन्नेछन्।
देशका कतिपय क्याम्पसहरूमा यसअघि नै निर्विराेध नेतृत्व पनि चुनिइसकेका छन्। हरेक दुई वर्षको अन्तरालमा हुनुपर्ने यस्तो निर्वाचन आन्तरिक विवादका कारण केही क्याम्पसमा भने १६ वर्षपछि मात्रै हुँदै छ । केही बाहेक त्रिविका आङ्गिक तथा सम्बन्धनप्राप्त क्याम्पसमा यसअघि २०७९ चैत ५ गते स्ववियु निर्वाचन भएको थियो । त्यसअघि भने २०६५ सालमा मात्रै निर्वाचन भएको थियो । देशभरि त्रिविको ६४ वटा अंगिक क्याम्पस र एक हजार ५३ वटा सम्बन्धन प्राप्त क्याम्पस छन् ।
सबैजसाे राजनीतिक दलका विद्यार्थी संगठनहरू प्यानल बनाएर चुनावमा उत्रिएका छन्। कतिपयमा गठबन्धन भएकाे छ भने कतिमा विद्यार्थी संगठनहरू एक्लाएक्लै भिड्दैछन्।
राजधानीका केही मुख्य क्याम्पसहरूमा भने तालाबन्दी भएका छन्। त्रिबिकाे केन्द्रीय क्याम्पसमै विद्यार्थी संगठनहरूले ताला लगाइदिएका छन्। यहाँ ८ गते चुनाव हुने भनिएकाे छ।
त्यस्तै अर्काे मुख्य क्याम्पस आरआरमा पनि साेमबार राति अनेरास्ववियुले तालाबन्दी गरेकाे छ। अमृत साइन्स कलेजमा पनि चुनाव स्थगित गरिएकाे छ। पाटन क्याम्पस तथा एनसिसीमा पनि निर्वाचन अनिश्चित छ। निर्वाचन निर्देशिका अनुसार प्रक्रिया बिथोलिएका सबै क्याम्पसमा चैत २० गतेभित्र निर्वाचन गरिसक्नुपर्ने छ।
Leave a Reply