हुम्ला —हुम्लाका चन्द्रे कामी र मुगुकी रमिला मल्लबीच उ मेर पुगेपछि राजीखुसी विवाह गर्न सक्ने सहमति भएको छ ।
शनिवार दुवै पक्षबीचको छलफलपछि कानुनी प्रक्रियामा अघि नबढ्ने र उमेर पुगेपछि (कानुनले विवाह गर्न दिएको उमेर २० वर्ष) चाहेको खण्डमा विवाह गर्ने सहमति भएको जिल्ला प्रहरी कार्यालय हुम्लाले जनाएको छ ।
जिल्ला प्रहरी कार्यालय हुम्लाका डिएसपी हेरम्ब शर्माले दुवै पक्षबीच सहमति गराएर आ-आफ्नो घरमा बस्नेगरी पठाइएको बताए ।
चन्द्रेले गएको मंसिर ५ गते रमिलालाई भगाएका थिए । घरमा बस्न सक्ने अवस्था नआएपछि उनी सर्केगाड-२, रिपगाउँमा लुकीछिपी बस्दै आएका थिए ।
चन्द्रेलाई नग्न बनाई निर्घात कुटपिट गरी बेपत्ता पारेको उनको परिवारले आरोप लगाएको थियो । तर, केटा आफैँ डराएर जंगलतिर भागेको खुल्न आएको डिएसपी शर्माले बताए ।
केही दिन सम्पर्कविहीन भएका चन्द्रे ७ पुषमा हुम्लाको खार्पुनाथ गाउँपालिका-५, याङ्चुबजारमा फेला परेका थिए । उनको खोजीका लागि हुम्ला जुम्लाबाट व्यापक मात्रामा प्रहरी परिचालन गरिएको थियो । प्रहरीले खोजी गर्ने क्रममा उनी एक्लै हिँडिरहेका थिए ।
केही समयदेखि दुवै जना प्रेममा थिए । घर परिवारले सहज रूपमा विवाह गर्न नदिने भएपछि उनीहरू भागेर विवाह गर्न बाध्य भएका थिए ।
चन्द्रे फेला परेपछि प्रहरीले दुवै पक्षलाई बोलाएर छलफल गरेको थियो । छलफलको क्रममा युवती पक्षले हातपात र तोडफोड गरेकोमा माफी मागेको थियो । यसै क्रममा युवतीले समेत दुवै जना राजीखुसी भागेको बयान दिएको प्रहरीले जनाएको छ ।
चन्द्रे पत्ता नलाग्दासम्म भने युवतीले टुनामुना लगाएर भगाएको बयान दिएकी थिइन् । पछि भने सहमतिमै भागेको बयान दिइन् ।
दुवै जना भागेपछि उनीहरूले वडाअध्यक्षलाई फोन गरेर विवाह दर्ता गराइदिन अनुरोध गरेका थिए । तर, वडाअध्यक्ष गोकुल बुढाले उमेर नपुगेकाले विवाह दर्ता गराउन नमिल्ने बताएका थिए । जसले गर्दा उनीहरू लुकिछिपी बस्दै आएका थिए ।
Leave a Reply