सोती घटनाः मुद्दाको सुनुवाइ सकियो, आजै फैसला सुनाउने तयारी

काठमाडौँ —  रुकुम पश्चिमको सोती घटना प्रकरणमा रुकुम जिल्ला अदालतमा जारी सुनुवाइ सकिएको छ । मंगलबार प्रतिवादीतर्फका केही कानुन व्यवसायी र सरकारी वकिलबाट जवाफी बहस भएपछि सुनुवाइ सकिएको हो ।

रुकुम जिल्ला अदालतका श्रेष्तेदार मन्दिरा शाहीले सुनुवाइ सकिएको जानकारी दिइन् । सुनुवाइ सकिएकाले आजै फैसला सुनाउने वा के गर्ने भन्ने सम्बन्धमा अहिले नै जानकारी नआएको बताइन् ।

२०७७ जेठ १० गते रुकुम पश्चिम जिल्लाको चौरजहारी नगरपालिका वडा नम्बर ८ सोतीमा नवराज विकसहित ६ जना किशोर तथा युवाको हत्या भएको थियो । प्रेमिका लिन भनी जाजरकोटबाट रुकुम पश्चिम गएका किशोर नवराज बिक तथा उनका साथीहरूको समूहलाई सोतीका स्थानीय बासिन्दाहरूले कुटपिट गरी सेती नदीमा बगाई हत्या गरेको आरोपमा नेपाल सरकारले ३४ जनालाई मुद्दा चलाएको थियो ।

३४ जनालाई प्रतिवादी बनाएर कर्तव्य ज्यान, ज्यान मार्ने उद्योग र जातीय छुवाछुतको कसुरमा मुद्दा दायर भएको थियो । प्रेमिका भनिएकी किशोरी हत्या भएको स्थानमा नपुगेको बयान दिएकी तथा अन्य तथ्यले समेत पुष्टि गरेको भए पनि निजकै कारण घटना भएको भन्दै प्रेमिका भनिएकी किशोरीमाथि समेत कर्तव्य ज्यान, ज्यान मार्ने उद्योग र जातीय छुवाछुतमा मुद्दा चलाइएको थियो ।

२०७७ साल जेठ ३२ गते रुकुम जिल्ला अदालतमा दर्ता भएको मुद्दामा प्रतिवादीको सङ्ख्या बढी हुँदा सुनुवाइमै लामो समय लागेको थियो । मुद्दा दर्ता भएको ३६ महिनापछि उक्त मुद्दामा आइतबारबाट निरन्तर सुनुवाइ गरी फैसलाको तयारी गरिएको हो ।