पुरोहितजी !
तपाइँ भन्नु हुन्छ
‘गौदान गरे मृतकका लागि स्वर्गको ढोका खोलिन्छ ।’
सदियौँ देखि गरुड पुराण धेरैले सुने / सुनाए
मृतकलाई कष्ट नहोस् भनेर
डढाल्नो भरी ऋणको भारी
बोकेर
अनगिन्ती परिवारले गौदान गरे / गराए ।
मैले जस्तै, सदियौँ देखि मानिसहरूले संशयका
प्रश्नहरू
मस्तिष्कको डोका भरी बोकेका छन्
र सदियौँ देखि प्रश्नका
डोकाहरू चुहिन खोज्दैछन् ।
अबको समय प्रश्नहरूका जवाफ र संशोधनको समय हो ।
पुरोहितजी !
तपाइँलाई केवल एउटा प्रश्न
सोध्छु म
जवाफ दिनुहोस् है ।
आजसम्म कुनैपनी मृतकले
गाईको पुच्छर समाएर वैतर्णी नदि तरेर
स्वर्ग गएको देख्नु भएको छ
तपाइँले ?
Leave a Reply