चौरजहारी (रुकुम पश्चिम) —१० जेठमा रुकुम पश्चिमको चौरजहारी नगरपालिका–८, सोतीगाउँमा भएको घटनामा ज्यान गुमाउनेमध्ये एक हुन् टिकाराम सुनार । त्यसदिन नवराजकी प्रेमिका सुष्मालाई भगाउन गएकामध्ये ऊनी एक्लै चौरजहारी नगरपालिकाकै बासिन्दा हुन् । मावली घर गएका टिकाराम साथीहरुसँग आफ्नै गाउँमा साथीलाई प्रेमिका भगाएर विहे गरिदिन गएका थिए । तर, उनलाई पनि आफ्नै माटोले जोगाएन ।
सँगै खेलेको भेरीको छालले सहायता गरेन । साथीको माया र साथसँगै बगे उनी पनि । लकडाउनको फुर्सदमा मावली गाउँ जाजरकोट गएका उनी १० जेठको साँझ बेपत्ता भए । १६ जेठमा भेरी नदीको किनारमा मृत फेला परे । त्यो दिन उनको मृत्युमात्रै भएन । उनको परिवारको खुसी, आशा र भरोसा पनि गुम्यो । श्रीमती सुमित्राको सुहाग पनि भेरीमै बग्यो ।
टिकाराम आफैं २० वर्षका मात्रै थिए, सुमित्रा पनि भर्खर १९मात्रै टेक्दैछिन् । उनको कलिलैमा सिन्दुर पुछियो । सानो बालाखा छोरी टुहुरी बनिन् । आमा गीता र बुवा सोबेको काख रित्तो भयो ।
चौरजहारीको शीतल माविमा ११ कक्षामा पढ्दै सोलार पावर जडानसम्बन्धी काम गर्थे उनी । उनका बुबाआमा मजदुरी गर्छन् । सोलारकै काममा अनुभव राम्रो भएपछि सोलारसम्बन्धी कामलाई व्यवसायका रूपमा विस्तार गर्ने योजनामा उनी थिए टिकाराम ।
‘साथीको साथ लागेर गयो, पापीले मारेर भेरीमा फाले,’ उनका बुबा सोबे भन्छन्, ‘नातिनीलाई टुहुरी बनाए, बुहारीको सिन्दूर पुछियो ।’ सोबेले एक्लो सन्तान गुमेको जस्तै पीडा नातिनी र बुहारीको बिजोग देख्दा हुने गरेको बताए । चौरजहारी नगरपालिका–१, लामिछाने गाउँमा रहेको उनको घरमा सान्त्वाना दिनकैलागि धेरै मान्छे आउदैनन्, तर पुगेकाहरु आँसु रसिलो पारेर फर्किन बाध्य हुन्छन् । परिवारको आर्थिक अवस्था कमजोर छ । ‘जमिन, खेतीपाती छैन, पेसा भने पनि नभने पनि दैनिक मजदुरी हो । नगरे गुजारा चल्दैन,’ सोबे भन्छन्, ‘बास बस्ने घरसमेत अर्काको जग्गामा छ । हाम्रो त सहारा नै गुम्यो ।’ एकातिर भविष्य अन्धकार देख्छन्, अर्कातिर न्यायका लागि आफैं दौडिनुपरेको छ । हत्यारालाई जीवित हुँदासम्म कैद सजाय हुनुपर्ने उनको माग छ ।
कलिलै उमेर सिउँदो पुछिएकी सुनितालाई अझै पति आइहाल्छन् कि जस्तो लाग्छ । बाटो हेरिरहन्छिन्, आँसु झरिरहन्छ, मन झन् झन् दुखिरहन्छ । ‘किशोर अवस्थामै जीवन साथी गुमाउने म जस्तो अभागी अरू को होला र ? यो संसारमा अरू के बाँकी छ र ?,’ सुमित्रा भन्छिन्, ‘मेरा साथमा एउटा मोबाइलसमेत छैन, सासूससुराले कति दुःख गर्ने ?’ सोबे दम्पती नातिनी र बुहारी देखेपछि भक्कानिन्छन्, सुनिता छोरी र सासूससुरा देखेपछि । एकअर्काले हेरेर टोलाउनुबाहेक अर्को विकल्प हुन्न, उनीहरुसँग । ‘छोरीले सधैं बाबा खै, बाबा खै भन्छे, मैले के जवाफ दिनु ?’ सुनिताले आँसु झार्दै भनिन् ।
घरबाट मावली गएका टिकाराम छिट्टै घर फर्किने तयारीमा थिए । त्यसदिन विहान उनले छिमेकी दिदी दिपालाई भनेका थिए, ‘मेरी आमासँग भिडियो कल बनाइदेऊ न दिदी’, ‘आमा गिट्टी कुटेर आएपछि साँझ पक्का है ।’ दीपाले भनेकी थिइन् । भिडियोमा कुरा गर्न खाजेको खबर सुनेकी आमाले भिडियो कलमा मात्रै हैन, अब कहिल्यै नभेट्ने गरी टाढिएका छन् टिकाराम । तर, उनले फेरि फेसबुकमा म्यासेज गरेनन्, बरु कहिल्यै नगर्ने गरी गए ।
भिडियोमा आमासँग कुरा गर्ने उनको योजना अधुरो भयो । टिकारामकी दुई वर्षीय छोरी र श्रीमती भावविव्हल बनेका छन् । बुवा शोभे नेपाली भन्छन्, ‘हाम्रो जिन्दगी भनेको त्यही एउटा छोरो थियो । अब के नै बाँकी रह्यो र ?’ छोराको किरियाकर्ममा सकेर बसेका उनले भावविह्वल हुँदै भने, ‘मेरो किरिया त्यही छोराले गर्ने आशा थियो । तर मैले नै छोराको किरिया गर्नुपर्यो । मजस्तो अभागी बुवा को होला ?’
टीकारामका बुवा त्यही सन्तानको लागि ६ वर्ष मलेसियामा रगत र पसिना बगाएर गएको कात्तिकको भाइटीकाको भोलिपल्ट घर फर्किएका थिए । टीकारामकी एकमात्र बहिनी छिन् । जो दाइको शव भेरीमा भेटिएको खबर सुनेदेखि बेहोसीमै बर्बराइरहेकी छिन् । दाइसँगको अन्तिम कुराकानीको शब्दले उनलाई पोलिरहेको छ । तीन वर्षअघि एसईई सकेका टिकारामले आर्थिक अवस्था कमजोर भएकै कारण त्यो भन्दा माथि पढ्न सकेनन् ।
सोवे भन्छन्, ‘यसरी कुटी कुटी मारेर फ्याँक्नेलाई सरकारले के कारवाही गर्छ ? के ग¥यो भने हामीले चित्त बुझाउने ? जे गरेपनि हाम्रो छोरा त अब आउदैन नै ।’ उनी थप्छन्, ‘यिनीहरुलाई त जे गरेपनि हाम्रो मन बुझ्दैन ।’ समाजमा दलित भएर बाँच्नुको पीडा सोबेले सानैदेखि लुकाएका छन् । गाउँमा सानो जात भनेर सबैले हेप्छन् । साना सेवा सुविधामा मात्रै हैन, मजदुरी गर्ने कुरामा पनि विभेद सहनुपरेको छ उनले । ‘पसिना बगाएर खाने ठाउँमा पनि उपल्लो भनौदाले हेप्छन्, बाध्य भएर सहनुपर्छ,’ उनी भन्छन् ।
१० जेठ शनिबारको दिउँसो चौरजहारी नगरपालिका–४ की प्रेमिका सुष्मा मल्ललाई भगाएर विहे गर्न गएका नवराज विक र उनका पाँच जना साथीहरु ठुली भेरीको छालसँगै बगे । उनीहरुसँगै उनीहरुको सपना र परिवारको खुसी पनि बग्यो । रुकुम पश्चिमको चौरजहारी नगरपालिका–८, गैरीज्यूलामा गाउँलेको आक्रमणमा वेपत्ता भएकाहरुको शव भेरीमा भेटिएको थियो ।
घटनामा परी टिकारामसहित जाजरकोटको भेरी नगरपालिका–४ रानागाउँका २१ वर्षे नवराज विक, २२ वर्षे सन्जु विक, १९ वर्षे गणेश बुढामगर, भेरी नगरपालिका–११ मटेलाका १८ वर्षे लोकेन्द्र सुनार र १७ वर्षे गोविन्द शाहीको ज्यान गएको छ ।
Leave a Reply