प्रतिनिधिसभा विघटनविरुद्ध १६ रिट, आजदेखि सुनुवाइ

काठमाडाैं — प्रतिनिधिसभा विघटनविरुद्ध सर्वोच्च अदालतमा दायर परेका १६ वटा रिट निवेदनमा आजदेखि सुनुवाइ हुने भएको छ ।

सर्वोच्च अदालतका प्रवक्ता अर्जुनप्रसाद कोइरालाका अनुसार प्रधानमन्त्रीको नियुक्ति तथा संसद् विघटन बदर एवं संसद् पुनःस्थापना समेतमा उत्प्रेषण, परमादेश आदेशको माग गर्दै दायर भएका रिटमा प्रारम्भिक सुनुवाइ हुनेछ।

कोइरालाका अनुसार संवैधानिक इजलासमा १६ वटा रिट निवेदनमाथि एकमुष्ट सुनुवाइ हुनेछ।  प्रवक्ता कोइरालाका अनुसार, सर्वोच्च अदालतको मूल भवन छेवैको ‘एनेक्स भवन’को माथिल्लो तलामा रहेको पुरानो कोठामा संवैधानिक इजलास सञ्चालन हुनेछ।

गत भदौ २३ र २४ गते भएको जेनजी आन्दोलनपछि नियुक्त भएकी अन्तरिम सरकारका प्रधानमन्त्री सुशीला कार्कीले प्रतिनिधिसभा विघटन गर्दै आगामी फागुन २१ गते चुनावको घोषणा गरेकी थिइन्।

त्यो बेला सरकारको नेतृत्व गरिरहेको नेकपा एमालेले पनि प्रतिनिधिसभाको पुन:स्थापना हुनुपर्ने माग गर्दै आएको छ। बाँकी पार्टीहरू भने चुनावको तयारीमा लागिसकेका छन्।