दलित समुदायको लागि पूर्ण समानुपातिक निर्वाचन प्रणाली: उपेन्द्र यादव

काठमाडौँ —   जनता समाजवादी पार्टी नेपालका अध्यक्ष उपेन्द्र यादवले दलित समुदायको लागि पूर्ण समानुपातिक निर्वाचन प्रणाली हुनुपर्ने बताएका छन् ।

दलित, पिछडावर्ग, थारू, आदिवासी र अल्पसंख्यक परिसंघ (डोटिम) ले शनिबार आयोजना गरेको राष्ट्रिय भेला एवं ‘समानता र समाजिक न्यायको अधिकार’ विषयक अन्तरक्रियामा उनले परिवर्तनका लागि एकता आवश्यक रहेको कुरामा पनि जोड दिए ।

परिसंघ स्थापनाको उद्देश्य नै सबैलाई एकताबद्ध गर्न भएकाले शोषण उत्पीडनमा परेकालाई एकताबद्ध गरी परिवर्तनका लागि संघर्ष गर्ने बताए । जनसंख्याका आधारमा प्रतिनिधित्व हुनुपर्ने र यही नै लोकतन्त्रको मुख्य मान्यता भएको उनको बुझाइ थियो ।

‘जबसम्म सबै उत्पीडित समुदाय एकताबद्ध हुँदैनन्, तबसम्म परिवर्तन हुँदैन,’ उनले भने, ‘यहाँ फुटाउ र राज गर नीतितहत राज्यले विभिन्न शक्तिलाई अलगअलग गरेर शासन गरिरहेको छ, अब अलग होइन, एकताको जरुरी छ ।’

डोटिम सबै उत्पीडित समुदायका लागि साझा मञ्च रहेको बताएका उनले अल्पसंख्यकलाई झन् कमजोर बनाउने षड्यन्त्र भइरहेको आरोप लगाए ।

‘कुनै पनि मानिस जन्मले, जातले, धर्मले ठुलो हुँदैन, कामले ठुलो हुने हो,’ अध्यक्ष यादवले भने, ‘जोसँग क्षमता हुन्छ त्यो नै ठुलो हो ।’ समाजमा म ठुलो, त्यो सानो भनेर भेदभाव भइरहेकाले समाज विभाजन भएको उनको भनाइ थियो । भने, ‘पहिचानको आधारमा भेदभाव गर्न हुनुहुँदैन, पहिचान प्राप्तिका लागि भेदभाव अन्त्य गर्नुपर्छ ।’

‘नेपालमा समानता छैन, सबभन्दा बढी दलित समुदाय पिछडिएको छ,’ उनले भने, ‘यो पुँजीवादी व्यवस्थामा दलितले चुनावमै प्रतिस्पर्धा गर्न सक्दैन, जब प्रतिस्पर्धा गर्न सकिँदैन, अनि जहिले पछाडि परिरहन्छन् ।’ उनले अहिलेको निर्वाचन प्रणाली पूरै काम नलाग्ने पनि बताए । सबैको समान प्रतिनिधित्व गराउन पूर्ण समानुपातिक निर्वाचन प्रणाली हुनुपर्नेमा जोड दिएका उनले प्रत्यक्ष निर्वाचन प्रणालीबाट कार्यकारी प्रमुख चयन गरिनुपर्ने पनि बताए ।