पोष्टमार्टम रिपोर्ट गलत : शान्तिपूर्ण आन्दोलनमा प्रहरीकाे दमन

काठमाडौं— अन्तरजातीय प्रेम विवाहको निहुँमा सुनियोजित ढंगबाट हत्या गरिएको सोती प्रकरणका मृतकहरुको पोष्टमार्टम रिपोर्ट गलत आएपछि नवराज विकको आमा सहित पीडित परिवारहरु आन्दोलित भएका छन् ।
नवराज र उनका पाँच साथीको पानीमा डुबेर मृत्यु भएको पोस्टमार्टम रिपोर्टमा उल्लेख भएपछि पोष्टमार्टम रिपोर्ट दिने डाक्टरलाई कारबाही गर्नुपर्ने भन्दै माग राखी आन्दोलनमा उत्रिएका छन् ।
शान्तिपूर्ण आन्दोलनमा प्रहरीले चार राउण्ड हवाइ फायर र एक राउण्ड अश्रुग्यास प्रहार गर्नुका साथै लाठी चार्ज गर्दा पाँच आन्दोलनकारी घाइते भएका छन् । झडपमा परि स्थानीय पदम बुढा, उर्मिला विक, हजारी नेपाली, भिजन बुढा र अस्मिता सिंह घाइते भएका छन् । घाइते पदम मृतक गणेश बुढाका बुवा हुन भने उर्मिला नवराज विककी आमा हुन् ।
मृतक नवराज विक सहितका आफन्तहरुले घटनालाई ढाकछोप गर्ने गरी पोस्टमार्टम रिपोर्ट आउनु गलत रहेको भन्दै विरोधमा उत्रिएका थिए । आन्दोलनमा उत्रिएकाहरू प्रहरीले तिरवितर गरी दमन गरेकाे थियो। आन्दोलनकारी स्वास्थ्य सेवा कार्यालयमा तोडफोड गरेका छन् । तोडफोडबाट स्वास्थ्य सेवा कार्यालयको एक्सरे मेसिनमा क्षति पुगेको छ ।
पोस्टमार्टम रिपोर्टमा के छ ?
नवराज र उनका पाँच साथीको पानीमा डुबेर मृत्यु भएको पोस्टमार्टम रिपोर्टमा उल्लेख छ । अभियोगपत्रमा उल्लेख भएअनुसार, सन्जु विक, टीकाराम नेपाली र गणेश बुढामगरको डुबेर मृत्यु भएको हो । नवराज, लोकेन्द्र सुनार र गोविन्द शाहीको हकमा मृत्युको कारण किटान गरिएको छैन । मृत्युको कारणमा ‘सम्भवत : डुबेर’ लेखिएको छ ।
लोकेन्द्रको टाउकाको अघिल्लो भागमा डाम परेको, दुवै खुट्टाको ददारिएका घाउहरू देखिएको छ । सन्जु विकको नदीमा खस्ने क्रममा टाउकाको विभिन्न भाग र आँखीभौंमा चोटपटक लागेको उल्लेख छ । नवराजको शरीरको बाहिरी तीन भागमा दाहिने र देब्रे कुहिनो ददारिएको अनि टाउकामा रड वा लाठीजस्तै केहीले हानेका घाउहरू देखिएको छ । टीकारामको टाउको र मुखलगायत घाँटी र दुवै खुट्टाका विभिन्न भागहरूमा रडजस्तै केहीले हानेको घाउहरू देखिएका छन् ।
गणेश बुढामगरको पोस्टमार्टम रिपोर्टमा लेखिएको छ– ‘दुवै हात, घुँडा र खुट्टाका औंलाहरूमा ददारिएका घाउहरू छन्, जुन जमिनमा खस्ने कारण भएको हुन सक्छ । तर, मृत्युको हुने जतिको गम्भीर होइन ।’ त्यस्तै, गोविन्द शाहीको शरीरको बाहिरी तीन भाग दायाँ तिघ्रा, देब्रे घुँडा र गोलीगाँठामा चोटपटक देखिएको छ ।
आरोपितहरूले लखेट्दै जाँदा नवराजलगायतको टोली भेरीमा हामफालेको र बगेर ज्यान गएको दाबी गरेका छन् । तर घटनास्थलको प्रकृति, बयान र अन्य वस्तुस्थितिले मारेर वा मरणासन्न हुने गरी कुटेर पानीमा फालेको पुष्टि हुने रुकुम पश्चिमको जिल्ला अदालत स्रोतले बतायो ।