संविधानमा दलित हक अधिकार चाहे अनुसार लेखाउन सकिएन : सभामुख महरा

दलित अनलाईन डेक्स

काठमाडौँ– प्रतिनिधिसभाका सभामुख कृष्णबहादुर महराले दलित आन्दोलनले प्राप्त गरेको अधिकारलाई संस्थागत गदै थप अधिकारका लागि दलित समुदायका अगुवाहरु एकीकृत रुपमा अगाडि बढ्नुपर्ने बताउनुभएको छ ।
दलित महिला केन्द्र नेपालद्वारा प्रकाशित ‘दलित नेतृत्व : सङ्घर्ष र सफलता’ नामक पुस्तकको राजधानीमा आयोजित विमोचन कार्यक्रममा सभामुख महराले थप अधिकारका लागि दलित अगुवाहरु एकीकृत रुपमा अगाडि बढ्नुपर्ने बताउनुभएको हो ।
दलित समुदायको पक्षमा संविधानमा केही मूलभूत अधिकार लेखिए पनि आफुहरुले चाहे जस्तो हक अधिकार लेखाउन नसकिएको बताउँदै महराले संविधानमा लेखिएको अधिकारको पूर्णरुपमा कार्यान्वयन गर्न सबै लाग्नुपर्ने बताउनुभयो । ‘जे जति कानुनमा अधिकार लेखिएको छ, त्यसको कार्यान्वयनमा सबै तहतप्काबाट लाग्नुपर्छ । ’
१३ जना दलित आन्दोलनका अगुवा तथा नेताहरु बारे लेखिएको सो पुस्तकलाई दलित नेताहरु परशुराम रम्तेल र गणेश विकेले लेख्नुभएको हो । लेखक राजेन्द्र महर्जनले सम्पादन गर्नुभएको हो ।


पुस्तकमा दलित आन्दोलनका अगुवा तथा नेताहरु उमादेवी वादी, कलावती पासवान, खड्कबहादुर बस्याल, छविलाल विश्वकर्मा, टेकु नेपाली, तिलक परियार, पद्यलाल विश्वकर्मा, मिठाईदेवी विश्वकर्मा, मानबहादुर विश्वकर्मा, रामप्रित पासवान, विश्वभक्त दुलाल, सन्तबहादुर नेपाली र सन्तोषी विश्वकर्मा संर्घष र सफलताको कथा समावेश गरिएको छ ।
‘दलित नेतृत्वः सङ्घर्ष र सफलता’ पुस्तक देशकै लागि ऐतिहासिक दस्तावेज भएको हुँदा त्यसबाट दलित समुदायका नयाँ नेतृत्वले सिक्नुपर्ने सभामुख कृष्णबहादुर महराले बताउनुभयो ।
दलित अधिकारकर्मी तथा मुक्ति समाजका महासचिव गणेश विश्वकर्माले संघर्षको हिसाबले दलित आन्दोलन अन्य आन्दोलनभन्दा उच्च रहेको दावी गर्नुभयो ।


नेपाली काँग्रेसका केन्द्रीय सदस्य मान बहादुर विश्वकर्मा, नेपाल कम्युनिष्ट पार्टी (नेकपा) का नेता तिलक परियार, नेत्रीहरु मिठाईदेवी विश्वकर्मा र टेकु नेपाली लागतयकले एकीकृत दलित आन्दोलनका जोड दिनुभयो । दलित महिला केन्द्र नेपालकी अध्यक्ष गौरा नेपालीले पुस्तकमा समेटिएका सङ्घर्षका गाथा कुनै व्यक्ति–विशेषको कथामात्र नभई सिङ्गो दलित आन्दोलनको इतिहास रहेको टिप्पणी गर्नुभयो ।


प्रकाशित | ९ मंसिर २०७५, आईतवार १९:०२

One response to “संविधानमा दलित हक अधिकार चाहे अनुसार लेखाउन सकिएन : सभामुख महरा”

  1. अमर सुनार says:

    बिशे नगर्ची,भगत सर्वजीत, हिरालाल बिश्वकर्मा, टीअार बिश्वकर्मा, मनबहादुर बिश्वकर्माका नाम छुट्दा अपूराे लाग्याे ।
    यसकाे नाम “अहिले जीवितहरुकाे चर्चा” दिएकाे हुने !

Leave a Reply

Your email address will not be published. Required fields are marked *

 

 

')