भरतपुर फोहोरमैला व्यवस्थापनमा नमूना सहर बन्छः मेयर दाहाल

गैंडाकोटचितवनको भरतपुर महानगरपालिका प्रमुख रेणु दाहालले महानगरलाई फोहोरमैला व्यवस्थापनमा नमूना सहर बनाउने प्रतिबद्धता जनाउनुभएको छ।

भरतपुर महानगरपालिकाले गैंडाकोटमा गरेको सहरीकरण, जलवायु परिवर्तन र अनुसन्धानसम्बन्धी एक दिवसीय समीक्षा गोष्ठीमा महानगर प्रमुख दाहालले ‘स्मार्ट सिटी’को अवधारणालाई साकार पार्न फोहोर मैलाको दीर्घकालीन व्यवस्थापन गर्न खोजिरहेको  बताउनुभयो ।

उहाँले भन्नुभयो , ‘भरतपुर महानगरको फोहोर व्यवस्थापन गरेर स्मार्ट सिटीलाई साकार पार्न महानगर लागिरहेको छ ।’ कार्यक्रममा मेयर दाहालले सबैको ध्यान भरतपुर महानगरले तानेको हुनाले यसले नमूना काम गरेर देखाउन आवश्यक भएको बताउनुभयो ।

कार्यक्रममा फोहोर मैला व्यवस्थापन सम्बन्धित विज्ञहरुले स्मार्ट सिटीको अवधारणा ल्याउनुअघि फोहोरको वैज्ञानिक तरिकाले उचित व्यवस्थापन गर्न सुझाव दिएका थिए ।

विज्ञहरुले कार्यपत्र प्रस्तुत गर्दै दीर्घकालीन रुपमा फोहोरको उचित व्यवस्थापन नगरेसम्म स्मार्ट सिटीको कल्पना गर्न नसकिने बताएका थिए । विज्ञहरुको कार्यपत्रमा दक्षिण एसियाली सहरहरुमा जलवायु अनुकुलनको लागि दिगो प्रयास फोहोरमैला तथा ढल निकास व्यवस्थापनको सुझाव दिएका थिए ।

कार्यक्रममा प्लास्टिक व्यवस्थापन र कर नीति र हाइड्रो डाइनामिक मोडलिङको विषयमा डा मणि नेपालले कार्यपत्र प्रस्तुत गरेका थिए । त्यस्तै, प्लाष्टिक फोहोर र व्यवस्थापनको विषयमा विज्ञ ऋषि कट्टेल, भरतपुर महानगरपालिकाकोे फोहोर संकलन सुधार गर्न उपभोक्ताहरुको चाहनामा डा राजेश राईले कार्यपत्र प्रस्तुत गरेका थिए ।

कार्यक्रममा साउथ इन्डियाका विज्ञ अजाम नथानेलले भरतपुर महानगरपालिका वडा नं १० को फोहोर संकलनको केन्द्र विषयक कार्यपत्र प्रस्तुत गरेका थिए । अन्तर्राष्ट्रिय गैर सरकारी संस्था सेन्डी एसिमोडसँग सहकार्य गरी महानगरले समीक्षा गोष्ठी गरेको थियो ।

कार्यक्रममा प्रदेश सांसद घनश्याम दाहाल अविनाश, प्रमुख प्रशासकीय अधिकृत नेत्र सुवेदी, सेन्डी एसिमोडका प्रतिनिधि भीम अधिकारीलगायतले मन्तव्य दिएका थिए ।

कार्यक्रममा भरतपुर महानगरका प्रवक्ता वडा नं १० का वडाध्यक्ष अरुणपीडित भण्डारी, ३ का वडाध्यक्ष चन्द्रमित्र पण्डित, ४ का वडाध्यक्ष हरि आचार्य, १२ का वडाध्यक्ष नरेन्द्र कन्दङवालगायतले सुझावहरु दिएका थिए ।


प्रकाशित | १८ आश्विन २०७५, बिहीबार १५:४८

Leave a Reply

Your email address will not be published. Required fields are marked *